隔牆有耳：日本露宿女藝術家訪港

隔牆有耳：日本露宿女藝術家訪港
2011年08月10日

邊個唔想有瓦遮頭？無家可歸係好無奈嘅事，日本女藝術家市村美佐子八年前卻自願瞓街，成為露宿者一分子，希望透過不同藝術活動關注東京露宿者處境。
有啲人體驗生活只係走馬看花，美佐子卻堅持八年，而且從不間斷每星期喺公園嘅無家者社群中開辦免費咖啡廳同自助繪畫班，令露宿者都享有「鄰居」社群生活，部份露宿者以物易物解決生活需要，互相照應，建立出 homeless but homey嘅社群歸屬感。
日本東京同香港一樣有唔少露宿者，美佐子接受油麻地活化廳邀請做本月駐場藝術家，以油麻地公共空間及露宿者生活為題創作藝術行動， 13日有講座， 21日展覽開幕，有興趣可留意。